喺2016/17球季贏英超冠軍嘅車路士，又係英國倫敦另一間長壽球會。1905年成立，有112年歷史，老球迷可能會諗起修爾斯呢個名，家陣叫車路士。
講起佢哋嘅會徽，一定諗起隻獅子同埋支權杖，但係原來隊波第一個會徽，係一個老人家嘅側影。基本上係抄當地一個退伍軍人會嘅徽章，一用就差唔多半個世紀。
車仔第一次改會徽，係因為1952年，做領隊嘅Ted Drake唔鍾意舊會徽，話要現代化一啲，但盾牌形狀加CFC字樣嘅會徽，只係用咗一年咁大把。
藍戰士第三個會徽，終於開始見到今日會徽嘅元素，有獅子同枝權杖。另外三朵玫瑰花係代表英國，兩個足球係代表呢項咁刺激嘅運動，呢兩個元素到今日都存在，但玫瑰花得番兩朵，足球一樣有兩個。
到咗1986年，車路士因為無辦法將第三個會徽註冊，於是出現隊史上第四個會徽，無任何形狀框住嘅獅子，加埋「CFC」。用到2004年之後，隨住阿巴莫域治入主球隊，加上球迷要求重用50年代嘅舊徽，於是第五代車路士會徽，喺經過輕微嘅調整之後就出現咗。當然，獅子嘅設計變得更加現代化，CHELSEA FOOTBALL CLUB三個字，亦都拆開上下兩排分開擺。