曼聯中場米希達利恩近期上陣時間買少見少，到底問題出喺邊？紅魔鬼領隊摩連奴又有新解釋嘞，就係話呢位中場根本唔值得有上陣機會！
米希達利恩喺曼聯近八場比賽嘅其中七場，連18人名單都入唔到，佢對上一次上陣，已經係11月25日對白禮頓場波後備登場。摩佬就解釋話球隊中前場有太多選擇，競爭自然激烈，所以無論正選同後備席位都一樣咁難爭：「後備席上面我只係可以擺六個守門員以外嘅球員，我又要顧住後備席上嘅平衡。對般尼茅夫場波，我有兩個後衛，戴利白蘭特可以踢好多個位置，艾舒利楊格就包晒翼鋒同翼衛嘅位置。」
摩佬繼續話：「安達靴里拉係中場，前鋒有伊巴謙莫域，拉舒福特係第二個前鋒嘅選擇。正選入面已經有安東尼馬迪爾、桑馬達同埋連格，要擺埋米希達利恩落去，就要用少其中一個人，但目前嚟講，我相信其他球員係更值得上陣囉！」
講咁多嘢，原來最重要嘅一句喺最後面！