IQ爆棚嘅勞工及福利局局長羅致光（CK）日前病咗仲繼續返工，但就失聲，出席立法會帳委會聆訊時要其他人代發言，其間仲自爆1993年起無睇過醫生，靠休息同飲水自癒，又果然，短短幾日間，佢已經好番！據知早兩日仲有啲聲沙沙嘅佢，噚日已經好精神，仲落區到觀塘，探訪長者並同觀塘區區議員會面。
CK噚日探訪過位於安達邨嘅東華三院安達長者鄰舍中心，安達邨同鄰近嘅安泰邨都係新落成嘅公屋，兩邨有逾28,000名居民入住，上述鄰舍中心就係其中一項社會福利服務配套設施，CK特別聽取職員介紹中心服務，同中心內長者傾談時就提醒佢哋注意保暖，仲預祝冬至愉快。佢之後亦有進行家訪，向獨居及雙老家庭長者大送禮物包，佳節前率先扮聖誕老人送暖。