通常墟市呢，都會喺假日先有，不過噚日社聯就喺灣仔告士打道花園，搞咗區內首個平日午間墟市，除咗有各式乾濕貨出售，仲有8個熟食檔參與，午飯時間仲吸引唔少「搵食艱難」嘅打工仔到場幫襯，其中一檔以新加坡手造薄餅招徠，大排長龍。
前立法會議員姚松炎亦到場支持，佢話呢個午間墟市夠晒「破天荒」，因為既可推動本土經濟，又可以善用公共空間，佢仲幫襯其中一檔手工袋，買咗兩個用舊米袋袋身做嘅揹袋㖭。
負責籌劃呢次墟市嘅社聯行政總裁蔡海偉就話，雖然市集只係搞一日，但事前都有好多準備工夫，佢都好希望，政府未來可以批多啲同類型市集，畀市民食飯時間有多個選擇。