【本報訊】無業獨居男疑遭他好心收留的女網友以滾水淋身，致身體嚴重受傷一案審結，案中被指是施虐者的女主角伍寧頤最終打甩所有罪名。本報取得兩人昔日要好及反面時的錄音對話和資料，發現伍不時會向獨居男施展冧功：「水瓶仔，我好掛住你呀！你快啲返嚟陪我吖！」但有時又會質問「做咩唔聽電話」、「你都戇X㗎喎」，及後更向男方攤牌：「其實我對你冇動過情喎。」
記者：蔡少玲
擁有高䠷身材、標緻外貌的伍寧頤（34歲），每次上庭也掛上委屈表情和楚楚可憐的模樣，外表確實非事主林志華（43歲）在庭上形容般野蠻霸道。事實上她與林要好時，常用溫柔嬌嗲聲線向林大施冧功，會暱稱林「水瓶仔」，「如果你唔錫我就冇人錫我㗎喇」，又會向林發文字訊息，「想你早啲返嚟陪我」、「我唔想冇咗你，我想你攬住我」。
林供稱伍原寄居於朋友家，及後要求他收留。自稱是佛家弟子的伍與林關係好時，會跟林講佛偈，林在庭上指她會錄唱大悲咒相贈。庭上透露伍患有腦瘤，自言沒工作能力要靠炒股賺錢。她篤信風水命理，入住林家前要求床位要「後有靠山，方位要好，上面冇橫樑壓頂，冇燈躓住……唔好影響我賺錢嘅財位」。
除了床位，伍連炒股票亦要求神問卜，她常以WhatsApp遙控林代勞求籤。林試過拒絕，之後伍炒股損手即歸咎於他，並收起平日溫柔語氣，以粗言怒罵：「你明知我呢個月黑仔唔掂㗎啦！梗係想問下㗎啦！邊個同我講呢啲唔靈呀？（如果）你肯去求，我會唔會亂入貨呀……（如果係）第二個？我X咗9年喇！」伍還責怪林「孤寒唔換好嘅WiFi」，導致她因網速慢「入貨時間慢咗」，連累她輸錢兼有數十萬股票無法脫手。
「講對唔住你嘅傷痕唔會消失」
雙方關係後來變差，伍向林攤牌：「其實我對你冇動過情喎，極其量都係介乎朋友同男朋友之間啲曖昧咋喎！」伍還警告：「唔好畀氣我受！我唔受得氣㗎，我會發癲！」
林指伍向他施襲，伍否認指控，錄音資料則顯示林受傷入院後，伍曾發錄音訊息哄「水瓶仔」：「你係咪好痛？你唔好嬲我啦，唔好唔睬我」、「我的而且確係傷害過你，我忘記咗自己係一個佛家弟子。」之後還提到前世今生，指彼此在「六道輪迴」中轉，更自責不應如世俗普通人般發脾氣。伍並稱不會向林道歉，因「講對唔住你身體嘅傷痕會消失咩？唔會消失㗎」，又說會在有生之年不斷念經當作消孽，「希望菩薩原諒我」。
後來伍離開香港赴澳洲，曾留言予林自爆可能要與當地一位朋友結婚，「借佢呢嚿踏腳石留喺澳洲」，但埋怨這位失婚朋友「婚姻宮唔好」，擔心是一個「氹」。