立法會修改《議事規則》大戰繼續上演，但噚日最搶fo嘅並唔係議事堂上嘅唇槍舌劍，而係「西環契仔」謝偉俊同民主派議員針鋒相對，公民黨譚文豪更重提謝偉俊十幾年前只着一條超人底褲、赤裸上身喺中環抗議事件，話佢「憑無比嘅勇氣，喺中環向公眾裸體」，謝偉俊就喺位上大叫，澄清當時有着泳褲。
譚文豪讚當年勇氣無比
譚文豪發言時提到有部份議員「有質素」，好似謝偉俊當年憑無比勇氣喺中環街頭裸體，係政府眼中嘅人才。當事人未出聲，經民聯石禮謙隨即反駁，話謝偉俊唔係裸體，有着底褲，引來一陣哄笑，連代主席李慧琼亦忍俊不住。譚文豪再澄清，謝當時係以「雄赳赳嘅身軀」着一條底褲展露身體。但原來都係錯，謝偉俊喺座位上話自己係着泳褲，譚文豪再三問道：「係唔係三角泳褲呀？」
屢被挑釁嘅謝偉俊終於喺公民黨郭榮鏗發言時按耐不住，話主席過份將就議員，又大鬧郭榮鏗係「古惑大律師」，激動地話「講咗唔肯認，借頭借路違規，失禮大律師行業」，最終謝偉俊喺主席梁君彥要求下收回言論。
謝偉俊近兩日嘅修改《議規》大戰中，屢次同民主派唔同議員有正面衝突，有民主派就話修改《議規》原來可以令平日扮中立嘅「西環契仔」現形。
李八方