馬會在每年的國際大賽，預留了幾個廂房來招待外國馬壇來賓，各國傳媒，特別來港參加賽事的遊客，所以此日的外賓特多。左丁山行經幾個廂房所見，自助餐以生蠔龍蝦主打，紅酒白酒無限量供應，愛吃海鮮和飲酒的外國人，無不盡歡，左丁山記得在新加坡馬場廂房吃到的Canteen式食物，便知道香港馬會贏新加坡馬會幾條街，東京馬場與雪梨蘭域馬場招待外賓的自助餐枱，也是普通貨色，難與沙田相比，怪不得外國傳媒及來賓，特別樂意來港接受款待。
在馬場見到大量日本人，可惜日本馬表現失色，不知他們有無敗興而返！不過勝敗乃兵家常事，不足介懷，反正香港馬參加日本安田大賽，也是輸多贏少的，左丁山倒願意見到「美麗傳承」、「四季旺」兩匹馬明年到東京爭奪安田紀念賽，為香港爭光。
賽事之後，到馬會會所凱旋廳吃晚飯，碰到不少熟人在此開餐，與最相熟的一位資深證券界人士股票S交談，自然談起股市，左丁山與他開玩笑：「喂，你同曹貴子熟唔熟，與蔡志明有冇來往，可以問多啲？」股票S騎騎笑：「我同曹貴子唔熟，我冇資格攞到蔡志明先生電話號碼，問唔到嘢！」呢個標準答案，似曾相識，已成為打太極佳句，總好過：「陳生你貴姓？」或者係：「哦，你食咗飯未？」睇蔡志明講曹貴子，講到曹醫生與父母一齊向蔡下跪求救，不禁有人問何世之嘆。做醫生開連鎖店式診所算係好成功，年入千萬閒閒地，一世無憂，點解要去學人在股票市場打滾呢？
股票S在市場五十年，由紅褲子做起，乜嘢都見過，佢話江山代有才人出，不少人認為自己頭腦靈活，有辦法，可在市場玩財技圖利，殊不知太陽之下無新事，1972年間，利獲家來香港表演炒高股價，以高P/E股去收購公司，再用同樣方法擴大同系公司，推高咗恒生指數；香港股民當年民智未開，跟風者輸到一仆一碌，股票S嗰陣係𡃁仔，冇錢炒，逃過一劫，亦有醒目仔從中獲利套現，從此不再沾手股票。四十幾年來，由利獲家，佳寧風暴至今天的啤殼工場，手法大同小異，老經驗者一眼睇穿，有心人如David Webb就研究出一份spider web謎網圖，刺激到監管當局採取行動，蜘蛛網嘅中心帶一旦被剪斷，整個網絡就立即陷落嚟嘞！與股票S講完，又見到一位年輕醫生，問佢識唔識曹貴子，佢話：「人就唔識，名字就大名鼎鼎，上個月醫院內正有不少同事羨幕佢唔做醫生，唔駛揼石仔搵大財，真天才也。現在當然唔係咁諗嘞！」