有時去到唔熟路嘅地方，冇晒方向感都咪話唔閉翳，運輸署最近更新「乘車易」手機App，加入「步行路線」功能，唔只話你知應該搭邊架車，仲教埋你行去目的地，可能幫到「路癡」，但新功能暫時只得銅鑼灣區有，涵蓋堅拿道東至興發街之間。運輸署總工程師羅慶新話，嚟緊會逐步擴展到全港各區，第二階段嘅油尖旺區下年底面世，粗略估計全個計劃要用過千萬，主要用喺收集數據，例如外判公司派員實地視察。
運輸署亦同殘疾團體傾過，了解佢哋嘅需要，未來幾個月會再推出無障礙版本。路向四肢傷殘人士協會主席、輪椅使用者嚴楚碧話，坊間其他地圖Apps雖然有類似功能，但好多時未必啱用，例如指示嘅路線需要行樓梯，或者行人路太窄、中間有燈柱咁，唔少朋友都試過因為咁折返，𠵱家出街主要都係靠經驗，所以好希望有無障礙路線，就算兜遠咗都無所謂，最緊要唔使行冤枉路吖嘛！