大家還記得有匹惡到趕貓走嘅歐洲不敗馬王「范高爾」呢？但做乜無啦啦提起佢，因為呢匹唔識寫個輸字嘅馬王，只係做咗老豆短短四年，已經慢慢變成地球上最強種馬之一。
事關「范高爾」每次嘅配種費，從明年起由原本12.5萬英鎊升至17.5萬英鎊，升幅超過40%，預計下年有超過130隻馬乸同呢匹種馬交配，從中朱德望牧場就有2,275萬英鎊左右的收入，即係差唔多成2.4億港紙，呢啲咪就係叫春宵一刻值千金囉！
點解值咁貴，學浩南哥嘅金句話齋：「巴閉、英雄主義、叠馬！」
諗吓英國冠軍錦標嘅「金庫神偷」、日本橡樹嘅「觸動心弦」，仲有香港兩戰兩亞嘅「精明才子」，都要叫呢匹不敗馬王做老豆。
俾埋真實數據大家睇，「范高爾」有12%嘅子孫贏過分級賽；拍賣出去未跑嘅馬仔，平均一匹都值50萬英鎊，17萬5千蚊等一年就變50萬。計計數，投資回報率有成285%，如果「范高爾」可以上市，真係當佢騰訊咁買都得。
不過「范高爾」未係全世界最貴嘅種馬，仲有隻係中東油王持有嘅「杜拜威」，一次配種就要25萬英鎊，仲有「范高爾」老豆「天文學家」直情冇講明要幾錢，所以「范高爾」想成為地上最強老豆，咁佢啲仔女要再努力贏多啲大賽才行。
圖片來源：互聯網