民主派就新界東同九龍西立法會補選搞初選，之前已經搞咗次選舉論壇，雖然都有多少火藥味，但啲問題始終太正經，不過噚日新界東3個參加初選嘅候選人張秀賢、范國威、郭永健一齊去商台節目，主持人問佢哋一條另類問題，就係如果佢哋不幸離世，死前要揀其中一個候選人祝福，佢哋會揀邊個？呢條問題其實都係旨在搞搞氣氛，點知佢3個嘅答案句句有骨，真係死都要爭過。
范寸張唔選又選
張秀賢、范國威、郭永健噚日一齊去商台節目《在晴朗的一天出發》，就俾主持人問佢祝福邊個，一直sell 後生嘅張秀賢繼續咬住年紀最大嘅范國威（Gary），話佢一定祝福Gary，仲話自己5歲時Gary已做區議員，仲話「我細細個聽過佢個名」，主持人之後問張秀賢係咪真心祝福人先？張秀賢仲加多句：「真心！做區議員做咗18年喎！好勁㗎喎」，咁點解又唔支持郭永健先？張秀賢即時再暗寸多句：「關愛座梗係讓啲老嘅先」。
咁俾張秀賢寸嘅Gary又點會唔還拖？佢話自己會祝福張秀賢，因為從政要有準備同承擔，咁先可以為市民服務，之後就暗寸張雖然年頭先話唔參選，但睇到張之後有為參選準備，之後即時借勢暗寸另一對手郭永健，話佢係突然彈出嚟參選，實行寸晒兩個人。
不過郭永健又點會係省油燈？佢話會祝福張秀賢，之後立即向Gary反擊，知佢睇住呢個位好耐！之後又讚張秀賢為理念參選，唔係為咗個位而出嚟選，擺到明寸Gary恨做議員先出嚟選！