韓劇《花樣男子》女星具惠善前日被爆唔再續約YG事務所，14年合作宣告結束。
事實上現年33歲嘅具惠善於2002年出道，第二年就簽約YG，多年來都獲YG栽培。要數具惠善代表作就必屬2009年嘅韓版《流星花園》(花樣男子)，令佢受到亞洲觀眾認識，亦曾拍攝台劇《絕對達令》，到前年拍攝《Blood》時就撻着同劇男星安宰賢，兩人更於去年結婚。
而具惠善出道15年，屬多才多藝嘅藝人，曾寫小說，又舉辦個人畫展，同時又係歌手，曾經同日本音樂家佐佐木功一一同舉辦演奏會，同時做導演拍短片，喺首部長篇電影《妖術》中，仲一人身兼四職，做齊導演、演員、編劇同作曲，認真犀利。
由於前日具惠善唔續約YG，所以令到佢即時成為韓媒及網民討論對象，當中佢昔日舊照仲出土，只見年紀輕輕嘅具惠善由細到大都係靚女一名，就咁睇完全係零整容美女，唔少網民都大讚佢天生麗質，亦戥安宰賢高興娶到個靚老婆。