今年度嘅Google熱門搜尋關鍵字出爐，以香港地區嚟計今年頭十嘅關鍵字當中，有足足七個係電視劇集，而剩低嘅三個就係大家都好鍾意炒嘅嘢，好似電話同股票咁，年度熱爆關鍵字排名如下：
1.降魔的
2.iPhone 8
3.不懂撒嬌的女人
4.iPhone X
5.反黑
6.使徒行者2
7.鬼怪 –孤單又燦爛的神
8.射鵰英雄傳2017
9.超時空男臣
10.易鑫
你冇睇錯，大台本來打算當係台慶炮灰嘅《降魔的》成功登上首名，其實套劇喺網上嘅討論度一向唔錯，仲有唔少人都覺得劇情有別傳統大台式套路，不過因為預算等等問題令到套劇有少少失色，但係整體嚟講都算係一套難得嘅新題材電視劇。
而其他好似《不懂撒嬌的女人》、《使徒行者2》等中港合拍劇都有上榜，十大當中嘅《射鵰英雄傳2017》就更加係大陸出品嘅劇集，當中飾演女主角黃蓉嘅演員大陸女星李一桐更登上女娛樂名人榜嘅第二名，輸咗俾喺《不懂撒嬌的女人》中飾演少女版宣萱嘅江嘉敏。
電影方面，本土出品嘅《一念無明》奪得第二，輸咗俾愛瑪屈臣（Emma Watson）嘅《美女與野獸》，不過就嬴咗《神奇女俠》、《盧根》等荷李活大片，除咗《一念無明》之外，港產嘅仲有排第八嘅《春嬌救志明》，值得一提嘅係榜上仲有《出貓特攻隊》同《軍艦島》兩套亞洲電影，而無論係合拍或者係大陸嘅巨獻，就一套都冇。
整體嚟講，今年香港人喺使用網頁搜尋器嘅時候都比較鍾意搵娛樂類別或者可以搵下外快嘅事物，或者係因為已經日對夜對生活上各種嘅不公同無奈啦，對香港本地嘅時事相對上似乎唔太關注。
更多娛聞，喺晒《娛果》
http://fb.com/appledailyent