立法會噚日繼續審議修改《議事規則》議案，議會內瀰漫緊張氣氛，火藥味濃，民主派同建制派繼續唔妥對方，不過正所謂「雞髀打人牙骹軟」，金融服務界議員張華峰（肥老闆）突然捧出多盤食物同水果，慰勞議員同記者，令緊張氣氛瞬間可以稍稍紓緩。
肥老闆話預計呢日立法會會有好多工作，所以佢特登預備咗西班牙巴拿馬火腿、蜜瓜、士多啤梨同pizza，要同大家提早過聖誕。肥老闆仲同八方講，其實隻原隻西班牙火腿唔係佢買，係有個朋友送畀佢，於是佢借花敬佛，攞隻西班牙火腿返立法會同大家分享，肥老闆又話請大家食嘢好小事，最緊要大家開心。