抽籤聽天由命，今次歐聯16強唔好運就好似熱刺同巴黎聖日耳門，難得首名出線點知都要遇到強隊；反而拜仁慕尼黑（圖）次名出線，以為肯定要同英超球隊或巴塞隆拿駁火，點知又畀佢抽中首名中叫最易打嘅比錫達斯，唔知係呢支土超勁旅黑仔，定抑或拜仁好命。車路士就66.6%會抽中強隊，同巴塞隆拿硬撼，要怪就怪自己唔爭氣攞唔到首名。
近年，皇馬、巴塞同拜仁呢三隊可以話一到歐洲賽，感覺就超晒班，最多係馬德里體育會同祖雲達斯兩支防守起家嘅球隊，夠韌力做吓攔路虎，但最後都功虧一簣。不過，好多人覺得「皇巴拜」今季已經冇之前咁強，不論歐聯分組賽或者喺各自所屬聯賽，都經常聽到佢哋失分嘅消息，當中拜仁仲要炒咗安察洛堤，而且同皇馬今次歐聯都只以次名出線，敵不過同組嘅熱刺同PSG，似乎今季歐聯有可能改朝換代，打破三隊近年悶爆嘅壟斷。
或者以目前走勢，皇馬要同剛喺分組賽刷新入球紀錄嘅PSG硬撼，有啲輸蝕，但16強係明年二月嘅事，中間會經歷歇冬同一月轉會窗開啟，PSG去到嗰時仲係咪咁強橫，會唔會有傷兵問題影響咗穩定性，值得再觀察；皇馬本身根基係強，只係好似C朗等球星上半季表現跌watt，但難保下半季打番起，而且就歐聯比賽經驗，點都秤高半班。
筆者當然想有新格局誕生，只不過現時要認定皇巴拜高峯已過，就過於武斷，球員狀態起伏、某些球員離開或老化產生問題，隊隊都有，但只係以班底同體系嚟講，佢哋仍然喺當今五大之內。
文：盧卡東尼