洪天明同港姐老婆周家蔚2012年拉埋天窗，婚後生咗兩個囝囝洪大仁、洪竟琋，老婆周家蔚一直恨生女，老爺洪金寶更下令趕快追女，兩人亦早有共識，揚言不設防追女，更考慮到美國做人工受孕，趕生一個女，怎料生女未有消息，洪天明就被指到上海媾女，仲俾人爆料去夜店消遣，公然拖女離開。
睇中高䠷妙齡
近年洪天明自組公司，經常往來內地工作，出入夜店傾生意，多數都係辦公事，但日前台灣有周刊報道，指有讀者報料稱洪天明喺上海夜店新天地出沒，唔見佢老婆周家蔚同行，只係見到佢約咗一班朋友，洪天明玩得好放，其間佢發現有人影相，即刻肅然起敬，之後好快又鬆懈，有一個戴帽嘅高䠷妙齡少女玩得又飲得，就被洪天明睇中，兩個人一齊走，去停車場一齊上咗一架私家車。洪天明雖然戴住帽加口罩，但一啲唔難認，而隨行女子就跟住洪天明尾，佢哋仲好似一度拖手，報道指，當時周圍有朋友把風，之後兩個人就坐車去咗日航飯店開房，仲好似情侶咁拖住手入去度春宵。
本報致電洪天明，噚日佢以短訊回覆傳媒「Funny. No reply la.」
撰文：馮仁昭
