以前就話雷神莫雷拉同蔡約翰係鋼鐵組合，但自從羅富全自立門戶以來，雷神同羅富全變咗信心保證，兩人連同今晚（13日）以「歐洲之星」贏出谷草頭場五班一哩，累積合作四匹轉羅廐初出馬錄得全勝！「歐洲之星」單Win及組合獨贏A1分別派38.5及17.5元。
五歲愛爾蘭馬「歐洲之星」出自2015年本地拍賣會，身價320萬元，出道後一直受訓於沈集成馬房，未轉倉前取得兩勝五位，包括贏谷草一哩及谷草1800米各一次。
今年夏天「歐洲之星」轉至羅富全，操足幾個月直至今晚才跑，距上次出賽已接近半年，結果重配雷神即響轉廐頭炮，克服負130重磅障礙，一放到底恍如變了另一匹馬，收韁仍大勝3.75馬位而回。
羅富全表示沒有想到「歐洲之星」贏得咁遠咁輕鬆，馬兒左前腳的蹄甲曾有毛病，現在已醫番好，賽前預計沒有馬放， 所以自行領放，今場步速真的很慢，對此馬有利，很開心為爭取勝利，希望牠上到四班負輕磅，仍然有爭勝機會。
羅富全獲封練馬師新人王，最近多埋五班王呢個新朵，呢場再一次印證呢樣嘢，從練頭馬增至27場，繼續壓住師傅蔡約翰領先成績表。
頭場前四名有熱有冷，二至四名分別為「金碧光芒」、「滿載而來」及「飛壹般」，四重彩派兩萬蚊鬆啲。