外籍騎師這晚（13日）反轉谷中，由頭場跑到第六場幾乎清一色佢哋贏晒，華將僅有潘明輝憑「金碧輝煌」攻下第三場。
其中第六場三班一哩，26歲法國騎師巴度夥拍沈集成馬房「威信」後上掄元，單Win及組合獨贏A2分別派97.5及28.5元。巴度連同第二場贏苗禮德馬房「再石磨藍」，成功起孖揚威快活谷夜賽。
四歲澳洲自購馬「威信」第二季在港服役，在港第11次出賽，連續第三次由巴度策騎，今仗初跑谷中，沿途守四五位，直路殺上甚勁，以1.2馬位之先衝贏對手，在港終於初嘗勝果。
「威信」馬主是97歲的港龍航空創辦人曹光彪，佢冒寒坐住輪椅入場打氣。結果皇天不負有心人，呢位老牌馬主賽後親手拉頭馬，練馬師沈集成及巴度亦戥佢好開心，兩人雙雙半跪遷就曹光彪一起拉頭馬。
沈集成表示「威信」取勝令他鬆一口氣，因為近期天氣很冷，曹光彪年紀又大，他請馬主入場，都擔心老人家受寒冷親，但沈集成話考慮到「威信」負輕磅檔位好，巴度晨操試完亦讚好，爭勝機會濃厚，因此主動邀曹光彪入場拉頭馬。沈集成表示「威信」目前心智仍未很成熟，周身都是蠻力不夠放鬆，暫時主攻谷草。
講番巴度，11月15日於谷草夜馬贏「紅褲精神」及「小米周」開齋兼起孖，今晚起孖亦在谷中，快活谷一下子做咗佢主場咁款。
第六場二至四名依次為「靚紫荊」、「開心遊戲」及「金獅叻將」，四重彩派五萬四千幾，三T正獎冇人中，齋中頭關第四場已可收每注518元安慰獎。