南美自由盃冠軍甘美奧前日憑艾華頓索拉斯喺加時一箭定江山，以1:0小勝中北美洲及加勒比海冠軍帕丘卡，殺入喺阿聯酋舉行嘅世界冠軍球會盃決賽。
兩隊喺法定時間互交白卷，需要加時再賽，結果巴西球隊甘美奧喺95分鐘，由後備上陣嘅前鋒艾華頓索拉斯射破帕丘卡44歲門將奧斯卡皮利斯十指關，為球隊奠定勝局，由於域陀古斯文喺加時下半場「兩黃一紅」被逐，帕丘卡喺最後10分鐘係以10人應戰，甘美奧晉級後，會喺周六嘅決賽同艾查捷拉對皇家馬德里嘅勝方，爭奪今屆世冠盃冠軍。
紅鑽險勝韋達得第五
至於世冠盃第五名爭奪戰，日聯嘅浦和紅鑽（紅衫）靠中堅莫里斯奧卡維奴梅開二度，以3:2險勝摩洛哥球隊韋達卡薩白蘭卡，奪得第五名。上半場有中堅莫里斯奧卡維奴同埋柏木陽介嘅入球領先2:1嘅紅鑽，喺下半場60分鐘，再由莫里斯奧卡維奴射入，將比數擴大至3:1，韋達卡薩白蘭卡雖喺補時四分鐘射入12碼，但為時已晚最終以2:3落敗，僅以第六名完成賽事。