香港郵政推出三款新面額通用郵票及相關集郵品，會喺1月1日正式發售。通用郵票面額分別為2.6元、3.4元及4.9元，以香港聯合國教科文組織世界地質公園嘅獨特地貌風景設計，好似面額2.6元郵票，係取自馬屎洲色彩斑斕嘅岩石地質景觀、3.4元面額郵票就係印洲塘「潮上平台」海岸侵蝕地貌，至於4.9元面額郵票係有六角形石柱分佈嘅花山。首日封就會喺今日率先發售，分大小兩個尺寸，售價分別係2.3元及1.3元，集郵者又係時候出動喇。今次發售嘅郵票及相關集郵品，會由今日起喺郵政總局、尖沙嘴郵政局、荃灣郵政局、沙田中央郵政局及屯門中央郵政局展出。
而元旦係公眾假期，除郵政總局、尖沙嘴郵政局、荃灣郵政局、沙田中央郵政局、屯門中央郵政局和機場郵政局外，所有郵局休息，上述6間郵局會提供一般郵政服務，但郵件派遞服務會暫停。