有病就要睇醫生？有神童之稱嘅勞福局局長羅致光（CK）耍手擰頭。立法會政府帳目委員會噚日就社會福利署管理整筆撥款進行公開聆訊，八方諗住睇睇CK點樣拆彈還擊，但帳委會主席石禮謙開場白就表明，改為社署署長葉文娟擔大旗發言，「局長今日把聲唔掂！」
林卓廷戲言打手語
事緣CK上周五直踩幾場，一場演講都講足兩粒鐘，又出席唔同活動，加上天氣轉冷，搞到聲帶發炎，出唔到聲，前日佢抱病出席立法會福利事務委員會會議時，仲係沙啞咁發聲。八方噚日問過CK有冇睇醫生，佢擰晒頭話「我一向都唔睇醫生」，無論中醫定西醫都耍手，佢話飲水同休息就夠喎。
CK向來有做運動，最近又參加渡海泳，一直好注重身體健康。佢自爆1993年起冇睇過醫生，「打預防針唔算啦」，有時輕微發燒都靠休息自癒，亦甚少有腸胃炎，仲笑笑口話對上一次失聲已經係1998年。
民主黨林卓廷知道CK失聲，打趣話佢可以打手語。阿廷可能深知CK性格，面對議員質疑又點抵得住？當佢講到鄰舍輔導會錯估財政導致裁員，CK即澄清話機構最終冇裁員；有議員不斷問機構儲備同津助計法，CK就由整筆撥款盤古初開講起，亦不時糾正，「係講緊累積儲備」、「撥款過程我哋唔睇預算」，佢話驚議員有少少誤會。
至於擔大旗嘅葉文娟表現都唔差，但可能被CK傳染，不時發言失聲或食螺絲，佢笑住話下晝把聲會好啲。
李八方