新民黨立法會議員容海恩同前社民連成員、輔仁媒體主編「容總」容樂其一向老友鬼鬼，噚日恩恩豬同沙田區議會主席何厚祥位於大圍嘅辦事處開幕，容總一早到賀，由於該辦事處原屬被DQ嘅社民連梁國雄，曾任長毛助理嘅容總就大爆：「我以前喺度返工」，恩恩豬多謝容總自動請纓嚟撐場。
恩恩豬嘅辦事處開幕，群星拱照，盛傳或辭職嘅律政司司長袁國強、發展局局長黃偉綸同特首辦主任陳國基等都有捧場。新民黨主席葉劉淑儀致辭時就話，「呢個辦事處以前主人係一位長髮男士，換成短髮美女」，指容海恩唔止靠美貌，都有實力，為街坊服務。
恩恩豬就賣口乖，多謝大家厚愛，仲話新民黨即將踏入7周年，係一個成就，多得地區支持，希望用理念感動街坊。袁國強離開時冇回應離任等問題，只係話有會要開提早走，臨上車前同記者講bye bye，唔知係咪語帶雙關？