趙慧珊（Aka）除咗係Super Girls成員，亦係業餘畫家，畫針筆畫有豐富經驗，下周四佢會喺上環ZZHK Gallery舉行首次個人慈善畫展「HER」，為香港婦女中心協會緊急援助基金籌款。
收起暴力畫風
外表文靜嘅Aka，筆下多出現暴力畫面，今次收起暴力，繪畫二十多幅以黑白、金色為主調嘅女性主題針筆畫，佢話：「金色係我對女性尊重同推崇，佢哋係值得珍惜同好珍貴。」之前為咗趕工不眠不休，每幅都要整幾日，Aka話：「今次畫展對我來嚟講工作量好大，但好享受。平時鍾意畫嗰啲負面沉重，爆頭、骷髏頭、啲肉同啲骨拉扯，攞出嚟怕嚇死人。」
原來Aka畫畫係無師自通，平時會上網睇好多畫家作品。首次辦畫展，Aka話心情好緊張：「緊張係因為自己唔係學院派出身，真正畫家會用專業知識去鑑定啲畫，好想畀人見到，我未必係好專業，但係好用心去畫。」對於畫作定價過萬一幅，佢話：「唔係我定，大會有專業定價，自己開頭估幾千蚊都貴，原來業餘畫家都要賣二、三萬蚊一幅。」
撰文：馮仁昭