禮拜日場英超曼市打吡賽後，據報雙方喺客軍更衣室武鬥，咁大陣仗梗有手尾啦！
英足總介入要交代
英媒禮拜一就狙擊據報頭部受傷流血嘅曼城助教阿迪達，佢揸車返到曼城訓練基地時，仲特登用手遮住額頭，似乎真有其事！有傳盧卡古就係掟傷阿迪達嘅「兇手」，而呢壇大龍鳳英足總已經介入調查，要求兩隊喺當地時間禮拜三下晝五點前，提交書面報告解釋，暫時未知有冇人或者球隊會被罰，而且過往冇乜案例，所以結果係點好難估計。
呢場曼市打吡以曼城作客贏2:1告終，話說紅魔領隊摩連奴同班球員，唔妥曼城喺客隊更衣室慶祝得太嘈，好似捧咗盃一樣，所以拉隊過去叫人哋細聲啲，結果逾廿個雙方職球員開始嘈起上嚟，有傳盧卡古用水樽掟中曼城助教阿迪達個頭，令對方受傷流血。而阿迪達禮拜一揸車返曼城訓練基地時，使出香港藝人、「師奶殺手」陶大宇嘅招牌動作，用右手掩蓋額頭同右眼，似乎特登遮住前額嘅傷口。
據西班牙電台《Cedenaser》報道，掟中阿迪達嘅就係盧卡古，不過，據悉紅魔方面否認呢位比利時鋒將喺衝突中有掟嘢，但就強調當時喺曼城更衣室有人向摩連奴潑牛奶，而呢一樣曼城方面亦都否認咗嘅。由於球證奧利華睇唔到衝突發生，報告並冇寫到落去，家陣英足總介入調查，要求雙方喺英國時間禮拜三下晝五點前為事件解畫，以便足總作進一步調查，而曼市警方則表示冇開file。
《每日郵報》就爆料，話當時摩連奴首先喺更衣室門口同曼城門將艾達臣摩拉斯嘈，然後就中頭獎，搞到曼聯後衞馬高斯盧祖等成班人衝出嚟，「藍月」隊長高柏尼仲帶埋費蘭甸奴成班人，喺走廊同紅魔「晒馬」，而阿古路等人就喺更衣室食花生，成場衝突大概維持咗兩分鐘咁啦。