人大選舉秘書處即將公佈正式候選人名單，而被取消資格嘅人據知除咗冇簽擁護憲法聲明嘅公民黨立法會議員郭家麒，就連7名報名參選嘅鳩嗚團成員、去年參選立會曾被DQ嘅楊繼昌甚至前政協劉夢熊預料同時被out，民主派只有高教界王凱峰過關，最終參選人數或只近48個，少過上屆52人！
激進民主派喺小小小圈子中出唔到閘都唔奇，但尖啤明明係建制派，何解冇得陪跑？表面睇嚟似乎同佢入獄18個月留案底有關，據聞人大嗰邊想同特區立會及區會選舉睇齊，唔畀入獄三個月或以上人士參選（唔知點解其他防賄等選舉規範又唔一併睇齊！）但實際上相信同尖啤多次發表反中言論，尤其幾番批評人大8.31決定有關，阿爺點會寬宏大量開綠燈？
而尖啤被DQ後，民主派喺王凱峰外又少個選擇，據知都係中央一大考慮，因為人大選舉用全票制，手持逾200票嘅民主派未必為一個人而另外投畀35個建制派，變相減低民主派對尾席嘅影響力，盡量減低非41欽點名單上嘅「外人」當選。