經民聯噚晚喺會展舉行5周年晚宴，唔少參選今屆人大代表選舉嘅建制派人士，都趁機到場拉票，互派寫明自己係人大選舉參選人嘅卡片，呼籲「多多支持」之聲不絕，令經民聯酒會猶如人大選舉拉票場。
其中最搶鏡，莫過於早前被傳不在西環祝福名單但仍去馬嘅前律師會會長林新強，皆因佢早前瞓厲頸要入院治療，但噚晚戴住頸箍仍堅持出席，仲同盛傳快將離任嘅律政司司長袁國強密斟同留影。
特區政府方面，除咗娥特同現屆司局長畀面出席，中聯辦副主任譚鐵牛亦有撐場，包括高永文、蘇錦樑、陳家強同葉澍堃等，當然唔少得今屆人大熱爆新丁譚志源，繼續同不同嘉賓selfie一番。