東華三院文武廟170周年，噚日舉行文昌啟智禮，由道長主持功德科儀，燃點文昌四寶燈及開啟青雲路，有逾400名市民與子女輪候祈求，希望聰明勤奮，學業有成，有喺官場及企業打工嘅市民就祈求工作如意，步步高陞。
喺港大讀二年級嘅鄒同學特別同媽媽到文武廟，佢話小學升中敲門入讀Band 1中學，媽媽擔心佢跟唔上功課進度，由嗰時起每年農曆12月1日嘅文昌啟智禮，都到文武廟祈求學業有好成績。
東華三院助理策劃主任梁中杰介紹番，每年開光嘅文昌御前加佑金榜嘅18張卷軸，狀元只得1張，其他係榜眼及探花，善信稍後可競投，寫上自己心願，但競投得嘅善信得神明加持外，都要靠自己努力先會有好成績，唔少父母同學生喺儀式前已輪候參拜，等候期間合十祈求。