立法會補選明年殺到，泛民黨派各有盤算，負責協調嘅民主動力召集人趙家賢擔任「夾心人」，真係死唔少腦細胞。呢位香港開埠以來史上當選時最年輕嘅區議員，原來擁有英國皇家音樂學院色士風（Saxophone）八級資歷，曾經係色士風導師。
中一開始學色士風嘅趙家賢最初原來係學琴，但對學琴真係冇興趣，學到三級就冇學。佢話接觸色士風係因為爸爸都識得吹色士風，加上中學又有得學，自細耳濡目染，一切都順理成章。喺中學階段完成埋八級色士風，趙家賢之後喺琴行授課賺外快，及後喺中大校外進修學院擔任色士風班首任導師。但工作實在太忙，家陣已經無教，只係平時喺地區周年晚宴喺街坊面前露兩手。
同高海寧係中學校友
1985年出世嘅趙家賢喺聖公會聖馬利亞堂中學讀中六時擔任Head Prefect，而當時中四有個師妹叫沈江莉，邊位？咪就係高Ling（高海寧）。趙家賢話沈江莉那些年已獲不少男同學關注，為咗幫兄弟認識同為領袖生嘅沈，負責「編更」嘅趙家賢試過為二人編埋同一更，「好可惜我個兄弟仲怕醜過高海寧，最終都係失敗咗」。
何解轉戰政壇？趙家賢話當年參加課外活動認識民主黨前東區區議員李建賢，之後幫李柱銘助選，其後入黨，2007年以22歲之齡喺東區太古城西當選區議員並連任至今。趙家賢話近排因為協調民主派初選安排「心力交瘁」，「唉，我已經半個月冇同老婆正式食過餐晚飯」。
