香港地方細細但周圍建築物密密麻麻，充份體現香港人執生能力。今屆港深城市建築雙城雙年展（香港）喺港島區8個地方設立展覽，主題為「城市執生：留得青山在的傳奇」，總策展人陳麗喬話主題用「執生」非常貼地，冀藉展覽介紹香港獨特建築、城市規劃及設計中嘅執生智慧，同時探討香港如何面對嚴峻土地問題等。
今次展覽場地包括中環站「港鐵·藝術」、中環街市、灣仔香港藝術中心、銅鑼灣希慎廣場等，佢建議市民去中環街市睇吓城市冷知識，喜歡藝術裝置則可到希慎廣場或藝術中心欣賞，而中環站為雙年展嘅縮影，用科技介紹各場地主題同內容，預計有30萬人次參與。展期即日起至明年2月11日，記得唔好錯過嘞！