立法會3.11補選日子塵埃落定，雖則建制派幾咁不滿日子同兩會呢件國家大事撞期，但都無奈接受安排，唔少建制中人話呀，當日要好頻撲咁由北京飛返香港唔係問題關鍵處，引述中央最不滿係特區官員唔識國情，明明遲一個星期就可以，點解偏偏揀個錯嘅日子？據知事件令政制及內地事務局局長聶德權中晒箭！
馮驊企硬 政制局孭鑊
據聞早前一段時間，四方八面都畀壓力娥班子，政務司司長張建宗早前都說漏了嘴，話特區政府對於改日期「我哋都努力過」 ，雖則林鄭冇正面回應，八方聽聞娥班子確實試過「力挽狂瀾」，但選管會主席馮驊卻企得好硬，始終選管會係獨立機構，娥班子最後都冇乜計仔，維持原判當然預咗一身蟻！
但大家又咪以為，建制派會將怒火燒至娥特，據聞當中唔少人認為三耳局長聶德權係首要孭鑊者，皆因選舉事務係由政制局負責，補選日子出爐前，作為局長，點會唔畀啲「溫馨提示」？而政府最初出稿提及3.11補選用「計劃」而非「決定」，都可見娥班子都聞到辳味。有建制派仲話，事件可見政務官做問責官嘅問題，就係唔熟悉國情，證明以後要多啲北上接受教育！
咁啱得咁蹺，中咗唔少箭嘅三耳局長會喺周三至周五娥特上京述職時隨行，唔知佢會唔會趁此行，向阿爺「赴京請罪」？
李八方