無綫前資深演員江漢（姜永明）上周四病逝，享年78歲。江漢與女星王小燕結婚後育有一女一子，記者昨日跟江漢叔曾效力快譯通足球隊的二子姜向暉取得聯絡，他透露江漢於7日晚在療養院睡夢中離開，是否因管脈炎離世仍有待確定，喪禮已訂於本月30日在世界殯儀館設靈，翌日出殯。
問到近年江漢身體是否欠佳時，姜向暉透過短訊說：「精神OK，但隻腳麻麻哋，冇力。」至於江漢可有心願未了？姜向暉說：「應該冇。」談到心目中的父親，姜向暉大讚：「我阿爸係一個好好的人，好爸爸，好為家庭，我做佢個仔，我引以為傲！」對於08年江漢以為兒子出事而險墮電話黨騙局，差點破財20萬元，姜向暉說：「係電話騙案，當時應該係唔畀佢收線，屋企電話都唔畀收線，所以當時佢冇辦法聯絡我，法庭口供都講咗係騙徒隨機打咗佢電話號碼，佢對所有親人，朋友都係兩脅插刀！」
古仔勤力有禮
古天樂和李珊珊日前表示拍攝《烈火雄心》一劇時，江漢對後輩十分照顧，姜向暉亦謂：「我都有聽阿爸提過，佢話古天樂、王喜、宣萱、李珊珊都係好有禮貌、好勤力嘅人，同埋佢哋好尊重長輩！阿爸仲話好欣賞鄭敬基唱嗰首《兩脅插刀》（《烈火雄心》插曲），佢話拍劇同睇劇本之後，再聽鄭敬基唱得咁好，佢好鍾意。」姜向暉又表示有看父親演出劇集，尤喜歡父親與陳觀泰演出的麗的劇集《人在江湖》，並指插曲《人在旅途灑淚時》十分動聽。
採訪：魯吉