今屆港區人大代表參選人之中，有一位後起「異軍」季霆剛（圖），就係拎住19個提名報名參選，仲狙擊同樣報名參加人大選舉嘅公民黨立法會議員郭家麒。
季霆剛加入政壇前曾經係公民黨黨員，其後嚟個急轉彎，轉會去到民建聯。今次仲要參選人大，唔少政界都質疑，唔通民建聯想爭多個位？
事實並非如此。有民建聯中人透露，季霆剛冇交會費好耐、試過追收亦冇下文，所以已經唔係民建聯黨員，希望外界唔好以為佢去選人大，係獲民建聯「推薦」。
八方都問過季霆剛，佢證實冇交會費，已經冇黨員身份，之不過咁，佢經常用嚟行走江湖嘅「浙江省政協」身份呢，則珍珠都冇咁真，強調係「浙江省政協港澳台僑特邀委員」，而大家只要google吓，就可以見到同時身兼全國港澳研究會會員嘅佢，不時以此身份喺左報撰文！