維港窄係窄咗啲，但去海濱野餐享受陽光，都係唔少人嘅假日好去處。而海濱一直都係官、商、民兵家必爭之地，多個關注海濱發展團體噚日成立「保護海濱聯盟」，發言人羅雅寧話，政府規劃混亂令市民用唔到海濱，而且歷年海濱發展唔透明兼缺乏公眾諮詢，希望集合唔同地區嘅力量，將海濱發展還政於民。
聯盟話海濱被破壞嘅例子都幾多，好似坐擁「天空之鏡」嘅西環碼頭就快被外判變社區園圃；鰂魚涌海邊又想起25層高樓；觀塘原本起茶果嶺海濱公園用地變咗起職訓局校舍，校舍用地就賣畀財團。公民黨郭家麒批評政府短視，一味賣海濱地賺錢，佢話商場全世界都有，但香港只有一個海濱，仲爆林鄭未升官發財前就話要設海濱管理局，做咗特首就唔出聲係自打嘴巴，既然講過「還港於民」就唔該付諸實行。