由細個返學到大個返工，對住老師同老闆發吽哣簡直係每個人與生俱來嘅能力，不過可以吽出個冠軍相信只有呢位科大仔先做得到。
事源來自韓國嘅第五屆發呆國際大賽噚日去到台北站舉行，一共有70人晉身決賽。嗱唔好以為鬥呆好易，比賽規定90分鐘內唔准用電子用品，連笑、傾偈、瞓覺都唔准，如果脈搏跳太快太緊張都要out。噚日台北天氣太熱，大會將賽時減到70分鐘避免大家中暑。結果由專程赴台參賽嘅香港人、科大四年級生陳棨豪以出色嘅呆功贏得現場觀眾歡心，得票最高奪冠為港爭「呆」，連同場參賽嘅電影導演彭浩翔都唔夠佢玩！
呢位新晉呆王知道自己贏咗冠軍都好驚訝，佢話秘訣就係盡量望前方，咩都唔睇，然後放空個腦，不過原來佢嘅呆功同大家差無幾，之唔係上堂吽出嚟囉。