皇家馬德里王牌基斯坦奴朗拿度（C朗）喺今季西甲冇乜波入，上周六迎戰西維爾之前只係入得兩粒，呢位葡萄牙球星啱啱喺上周四大熱贏得金球獎，今場表現就醒喇，賽前先向巴拿比奴主場球迷show吓佢歷來五個金球獎獎座（圖），對住西維爾就梅開二度，幫皇馬5:0大勝對手。C朗喺今季西甲首次梅開二度，加埋拿祖費南迪斯、卻奧斯同小將阿舒拉夫各入一球，幫皇馬贏到今季最大聯賽勝仗。
皇馬踢完呢場後就準備去阿聯酋，備戰世冠盃四強，佢哋嘅對手亦已揭盅。上周六兩場世冠半準決賽，東道主艾查捷拉1:0小勝紅鑽，將會喺周三鬥皇馬；另一場帕丘卡踢到加時以1:0險勝韋達卡薩白蘭卡，晉級四強就會對甘美奧。