澳職禮拜日嘅三料娛樂，最矚目嘅悉尼打吡踢出一面倒賽果，FC悉尼（圖）作客5:0大炒由前傑志教練甘巴爾帶隊嘅西悉尼流浪者，悉尼踢10場贏足八場，相反流浪者就喺甘巴爾上任後五場都未開齋，仲要一場輸得甘過一場，戰績仲衰過之前普波域教嘅時候。
FC悉尼用一貫嘅4-2-3-1陣式，波蘭右翼美亞斯祖斯基先喺14分鐘開紀錄，流浪者及後試過遠射中楣彈出，但谷一段後就無以為繼，完半場前四分鐘連失兩球，悉尼靠保斯基入波，同埋美亞斯祖斯基梅開二度，悉尼帶住三球優勢完半場。由於今輪澳職搞「星戰周」，半場嘅時候有架帝國軍TIE fighter喺球場上空飛嚟飛去，但就幫唔到流浪者喇，53分鐘先有前鋒拉治蘭史葛回防擺烏龍，76分鐘再俾悉尼中場班頓奧尼爾埋齋贏夠五粒。
悉尼喺榜首領放，但流浪者換咗甘巴爾教之後就五場只得兩分，跌落尾二。同日頭場布里斯班獅吼主場0:0悶和威靈頓鳳凰，尾場珀斯光輝就主場1:2不敵紐卡素噴射機。