阿士東維拉多咗位副領隊？上星期五維拉領隊布魯士（右）喺鬥米禾爾嘅賽前記者會宣佈，五歲嘅維拉球迷Carter Carrington（左）會成為維拉副領隊。出席嘅傳媒都非常配合，仲叫Carter預測賽果。Carter仔其實係一位無咗左腳嘅小朋友，佢出世嘅時候有一種病，令佢嘅左腳少咗一條骨，亦都無咗部分韌帶同一隻腳趾，同時左、右腳嘅長度會唔同，所以Carter仔喺11個月大嘅時候就接受咗截肢手術。維拉嘅球員因為聽到Carter仔贏咗當地一項跆拳道比賽而開始留意佢，更難得係，Carter仔係呢項比賽唯一嘅殘障參賽者。維拉之後聯絡Carter嘅爸爸，幫佢安排咗呢次活動。