今季有兩位馬主朋友行上馬場鴻運，就是「同得福」、「喜得福」兩馬的馬主易劉瑛琳與夫婿易國良，及「智有心得」馬主吳嵩，「同得福」與「智有心得」這兩匹馬在9月3日馬季開鑼日的第一場和第二場分別跑第一，令左丁山中了一口孖寶兼有機會拉頭馬影相。之後「同得福」、「喜得福」再分別贏一場，「智有心得」再贏兩場，於是左丁山在短短三個月內拉了6次頭馬，創下個人歷史紀錄，易氏伉儷與吳嵩過去亦從未有如此贏馬運氣！今日是國際大賽日，全球精英騎師雲集沙田馬場，各國名駒爭奪香港瓶，香港短途錦標，香港一哩錦標與香港盃，頭馬獎金屬全球頂尖級，爭標馬匹來自日本、愛爾蘭、英國、法國、美國，預料有連場決鬥，精彩可期。
想不到的是，吳嵩主理的團體馬「大英雄」剛在周三夜馬勝出，今日又派「智有心得」越級挑戰第三班千八米（第一場14號），可說野心甚大，吳嵩對計算馬匹實力，向來精確，今次竟敢在大賽日報名參賽，想來會是「唔贏得都砌得」，拖冷腳不可或忘。第九場11號「同得福」可能仍以大熱門姿態出現，上次初跑三班千四，輸四份三馬位，吸取經驗後，今日有力再添一場頭馬，左丁山又有機會影相了。
正本戲當然是國際賽。第四場香港瓶跑2400米，長途氣袋最好，香港馬比較吃虧。1號「高地之舞」係2015冠軍，2016亞軍，今年仍配莫雅有力一戰，唔要唔得。日本來者不善，已經視香港國際賽為銀行ATM，每年來港㩒機攞獎金，12號「神業」在10月22日贏菊花賞一級賽，係爭勝對象，呢場十二隻馬出賽，一於1、12雙膽拖全餐。第五場香港短途錦標跑千二米，今年日本馬唔見有好似「龍王」咁嘅級數，應該係本地馬控制大局，1號「紅衣醒神」，2號「幸運如意」實力不相伯仲，有既生瑜何生亮之嘆，以1 、2雙膽複式拖3號「幸福指數」，5號「華恩庭」，9號「有得威」，4號「澳斯卡」，13號「每月一回」，雙膽五腳買四重彩。第七場跑千六米香港一哩錦標，仍是本地馬天下，新亞校董郭少明嘅家族夫人及公子出兩隻馬，1號「美麗大師」，10號「美麗傳承」皆有力一爭，新亞師弟賴偉智嘅「壯思飛」，全年目標在呢一場，可惜隻馬較早前有小毛病傷患，影響機會，照睇就係1、10，與7號「四季旺」及日本馬4號「神燈光照」呢四隻機會大啲，冷腳加埋3號「詠彩繽紛」。第八場二千米香港盃，全日高潮，香港馬4號「明月千里」係擂台躉，2號日本馬「新寫實派」挑戰之，配腳揀3號「詩人之言」，11號「金髮俏馬」，5號「善得福」。