一直以嚟港鐵都流傳好多鬼古，噚日又有網民喺網上聲稱朋友影到港鐵車廠有女鬼，仲繪影繪聲話早幾晚柴灣港鐵車廠，有人「見一女鬼披頭散髮，長髮到腰着白袍企喺路口唔郁，嚇到全部伙記縮晒入房唔敢出嚟」。張相放大後見到一白衣女子朦朧身影，唔少網民睇完都話好恐怖，但有眼利網民就質疑話，相中「女鬼」似孭住手袋。唔知係咪鬧鬼傳聞搞到港鐵員工人心惶惶，港鐵傍晚就喺官方facebook專頁上載短片，話訪問咗一位車廠員工「龍哥」，呢位「龍哥」話聽到車廠有同事見鬼，於是去「探靈」。最後佢話得啖笑：「車廠真係好多『鬼』，路『軌』吖嗎！」佢話相中女鬼只係港鐵一個女同事，係「人」。但係個女同事點解半夜三更落車廠，佢就冇再解釋。