教主黃毓民同黃洋達反面反到出晒面就係人都知㗎喇。兩派支持者、以至兩人創辦嘅網台時不時就互數對方，日前仲鬥到上法庭。教主個網台MyRadio前日就入稟高院，狀告熱血時報網台女主持伍淑儒誹謗，話對方唔單止暗寸MyRadio搞黃賭毒，仲詛咒會有報應。教主就出律師信要伍say sorry，再告上法庭。
件事就源於伍喺9月27號、喺fb post咗句「My Radio繼續搞你地D黃賭毒啦！報返落後代的！」原告Myradio.HK Limited話伍影射佢哋專搞色情、賭博同毒品生意，影響聲譽同收入，仲話佢哋嘅《毓民踩場》、《贏爆洲際盃》、《贏爆全世界》一路廣受好評，𠵱家收入大跌。原告話個post出咗10日，大嗱嗱有兩人share同埋95人畀咗like或者嬲嬲，fb咁多人睇，話唔定都真係有影響，𠵱家要伍賠償同道歉。