今年由學者變高官嘅勞工及福利局局長羅致光（CK），一向IQ爆棚，咪以為佢識得腦筋急轉彎，細個肯定狂煲參考書實用書等等，原來CK年紀小小時，經常刨嘅係馬經。
羅致光喺慶祝長者安居協會20周年會慶結編成書嘅《20種港式成長》中透露， 自己年幼時經常刨馬經，每次跑完馬，佢都會睇吓啲馬評人表現，望望佢哋究竟賺多定輸少？人家英雄出少年，CK就馬場出少年，諗法果然零舍不同。
CK仲喺書中透露，原來佢有讀寫障礙，睇字係掉轉邊，所以除咗計數叻之外，不甚了了，但後來呢位小夥子覺得，人生點都要考一次第一，於是就喺小五時，將所有可以背嘅科目通通讀熟，結果如願考到第一名。嘩，淨係呢點已經同搵佢入熱廚房嘅林鄭好夾啦。之不過當中都有少少分別，佢覺得第一呢樣嘢，考過一次就夠晒，唔似得娥特小時候，考唔到第一會喊晒口。