葛博 阿娟 夾擊碧雲姨
噚日民主派同建制派喺立法會就議事規則打大仗，好多建制派都被迫坐定定，防止民主派點人數，而民主派搞議會抗爭，只求交人嘅建制派咁錫身，點會同主席梁君彥頂，咁休會期間佢哋搞乜？咪個個玩facebook live，不過就玩出大頭佛！
好似民建聯議員葛珮帆博士同黨友周浩鼎輸流揸機做live，其間民主黨議員黃碧雲雙手高舉「今日改議事規則 明天廿三條立法」牌喺鏡頭前抗議，周浩鼎雖然係咁叫唔好、工聯會麥美娟又舉埋自己件披肩遮擋，但一樣冇用，結果連謝偉俊都出手搞黃碧雲，謝右肩仲疑似掂到對方，搞到碧雲即場大叫唔好掂佢，仲大嗌謝偉俊性騷擾佢呀！連毛孟靜亦上前鬧謝偉俊咁做好過份。
尹兆堅出片笑何傻賢
另一個出事嘅人就係民建聯議員何俊賢，佢原本想反駁民主派話「今日修改議事規則 明日廿三條立法」口號，但佢無端端話23條立法「要立法會整體三分二同意，即係要48位議員至通過到」，結果俾民主黨尹兆堅喺fb出片恥笑佢係何傻賢，話23條立法只要過半數同意就可通過，唔係佢講嘅三分之二，叫佢唔好誤導公眾！
李八方