除咗玩facebook live，班建制派似乎真係無聊到冇乜嘢好做，好似過去試過開會期間，用立法會電腦喪睇另一議員、白鴿黨黃碧雲資料，笑死唔少傳媒嘅建制派議員「潘少」潘兆平，噚日開會又有新搞作，佢今次唔再係睇民主派議員資料，而係邊開會，邊「揸車」去天水圍！
開緊會都可以揸車？話說民主派今日同建制派議員謝偉俊唇槍舌劍之際，潘少喺議事廳內，就用立會部電腦，悠然自得咁打開google map駕駛功能，一直喺立法會部電腦風馳電掣，揸咗足足幾分鐘仲未完。
潘少其後喺建制派小休時同八方解釋，因為星期日要出席一個機電安全推廣活動，位置喺天水圍花田韓式燒烤場，佢因為之前未去過，考慮緊周日自己揸車去，所以就喺開會期間睇定路，預一預到時點行喎。