電競概念股Razer（雷蛇、1337）喺「打機界」可謂無人不曉，一眾機迷對Razer嘅熱愛絕對唔止係一個鍵盤生產商咁簡單！之前已經提過，Razer創辦人陳民亮（Min）係唔少「機迷」嘅神級偶像，Fans將公司三頭蛇logo甚至佢個名紋上身都未夠誇張，最新就有Fans將阿Min個樣直頭紋上隻腳到！
事緣上月底阿Min喺自己Facebook 出post話會送出一部Razer Phone手機，吸引唔少網民留言，其中嚟自美國嘅Matt就留言問阿Min，話「可唔可以將你個樣紋上身去換一部Razer Phone？」
據了解，阿Min唔太相信佢會咁做，爽快應承，仲話會送一部簽名版。點知Matt講得出真係做得到，好快就將阿Min個樣紋喺自己右小腿上面，阿Min亦冇走數，噚日開post大讚Matt「well played」，話佢將呢份狂熱推到一個新水平咁話。
Razer Phone上月喺歐美推出，華華收到風Razer終於將部電話帶來香港，今日會公佈詳情，之前叫價699美元（約5,452港元），唔知嚟到香港會唔會平呢？最後真係要問一句，為咗部電話，或者偶像你可以去到幾盡？
李華華