嗰頭講緊潘頓今晚（6日）谷草第一、三場都俾雷神食住做二奶，呢頭佢即刻在國際騎師錦標賽首關建功，一吐烏氣。
香港前冠軍騎師潘頓，於騎師賽首關第四場四班一哩，策騎沈集成馬房落飛馬「大英雄」後上一攻而破，個人搶先在騎師賽拎到12分領導群雄。「大英雄」季內首勝，單Win及組合獨贏A3分別派92.5及21元。
「大英雄」沿途守第六位，直路潘頓狂鞭狂推，好像跑一級賽般賣力，結果千軍萬馬中險勝短馬頭位。「大英雄」馬主是馬聖之友團體，此駒上季中贏谷草三班1200米開齋，當時同今晚一樣都係跑B賽道。
講番潘頓，跑騎師賽咁多次，累積兩度做總亞軍未曾封王，但今晚一開波就拎12分帶頭！
沈集成表示「大英雄」超級難發揮，需要硬功騎師，今場潘頓表現實在冇得頂，尤其末段衝刺時騎得非常硬淨，不得不讚。沈集成又透露「大英雄」很容易體重增加，變得重身，賽前要做很多備戰功夫，才可收身應戰，由於此馬落腳漸慢，因此一哩比1200米更合發揮。
高手過招之下，第四場成堆馬鬥埋一嚿衝線，非常緊張刺激。其中蘇兆輝騎另一落飛馬「一支梅」影相不敵「大英雄」做阿二，「一支梅」馬主是女歌手JW男友葉韋彤。三、四名分別由大熱門莫雅座騎「無限欣賞」及雷神座騎「萬里威揚」取得，四重彩派三萬蚊多啲。
賽後蘇兆輝依例有六分，莫雅則有四分，兩人在騎師賽龍虎榜於潘頓之後，暫時分別排第二及第三。