一位年輕朋友家住大埔而往貝沙灣數碼港返工，成日埋怨路途遙遠，交通不便，聽得怨聲多，左丁山忍唔住哦佢兩句：「你有選擇嘅啫，一係搬去數碼港或黃竹坑住，一係辭工搵過第二份，唔好咁多聲氣。」朋友嘆一聲：「唔好激我，我點住得起貝沙灣？我住在大埔公屋，又點可以搬去華富邨呀？租私樓呀？租金會食咗我份糧。唔辭工就因為公司係start up，老闆與我同樣係80後，大家好夾，大家一齊發夢我地會係明天汪滔，點肯辭工吖！」
講得幾有道理，但最初點解揀去數碼港呢？朋友話：「老闆當初得到一啲資金幫忙，申請得數碼港Incubation Programme ，入去可以免租金，每年出外參加相關產業展覽又有津貼，好好囉，慳番我地唔少錢，為咗錢，老闆、我，同幾位同事都要犧牲交通時間去遷就啦。」原來如此，去數碼港的確唔方便，有咗地鐵港島南綫之後，以為會好啲，但其他交通工具跟唔上。大編輯上星期自銅鑼灣去金鐘坐地鐵去黃竹坑，好快就到，但在黃竹坑轉巴士或小巴去數碼港，竟然等足三十分鐘以上，於是用咗整整一個鐘頭，大嘆嘥時間。佢以前曾在數碼電台返工，當時已經覺得唔方便嘅嘞。
近日在中環行街，又碰到數碼港之初創公司朋友，佢好開心咁話：「好咯，過咗農曆年，我地搬去科學園，我由大埔公屋去，快好多，諗起都笑一餐。」咦，唔要數碼港津貼嗱？朋友話：「其實係再無資格攞津貼，我地已經過咗年期，要交番租金二十幾蚊一呎，所以公司上下開會，全部贊成搬去科學園，租金都係一樣嘅啫。」哦，科學園交通好啲喎，在大學站有大把小巴的士接駁，離開大學站又近，沙田火車站又有小巴去，還有一個要點，就係初創科技公司步入少年階段後，所有產品製造及零件供應，都係要上深圳接洽，由科學園去大學站搭火車往深圳，快過數碼港好多啦，甚至去羅湖與廠家食午餐談生意然後返回科學園都得。現在情況係科技公司可在科學園搞R&D，推廣國際市場關係，得到訂單就去深圳搵工廠製造，於是科學園比數碼港更有地利，員工方面，沿鐵路綫往返沙田、又一城、旺角玩樂，更加開心，咁就唔怪得科學園版圖一味向北移嘞，仲益埋沙田凱悅，難怪咁好生意㖭！