14歲，話大唔大，話細唔細，得14歲離開出走，唔靠屋企，如果呢個年紀要你自己生存，你又得唔得呢？o依家呢個年代當然冇乜可能，但喺70年代，只要靠雙手，其實真係可以闖出一片天。
翁靜晶喺14歲嗰年離家出走，當年得9歲大嘅細佬仲跟埋一齊走，兩個小朋友身上只有少少錢，唔夠幾日已經用晒，冇錢，就唯有諗方法搵錢：「冇工作能力都要搵，咁我點呢，我有工作能力㗎，我搵咗個膠桶，買咗啲冰、買咗啲汽水，兩個人走去淺水灣度賣汽水。」翁靜晶話最尾細佬可能因為年紀太輕，一齊離家出走一個禮拜就頂唔順死死地氣番咗屋企，剩低翁靜晶一個繼續堅持。
但係講到佢如細佬賣汽水嘅故事，翁靜晶仲記得好清楚，仲好自豪：「成本價一蚊，你呢就因為可愛，嗰陣時14歲人仔好sweet咁拖住個細佬，見你哋咁得意，用三倍價錢幫你買都好願意啦，好多叔叔伯伯幫你買㗎，我搵到錢㗎，唔好睇少我啊，有腦㗎嘛，哈哈。」
記者：嵐山、馮國康、倩宜
攝錄：馮峰、卓振輝
攝影：陳俊強