這樣的橋段，當然比較接近業已式微的無綫師奶劇，嚴重挑戰一般觀眾的耐性和接受能力，就算巧妙借用艾慕杜華經典的名字，都掩蓋不了那陣攻鼻的街市味。前兩日，乖仔還在社交網絡高調質疑自揭性侵的欄后「篇嘢成篇係雕琢而成嘅商業文案」，不惜將威威建築在別人的痛苦上，嘴臉的難看令人不忍直視，坊間吐痰之聲此起彼落，誰不知一轉頭他媽就挺身而出，話自己曾幾何時也是色狼魔爪下的受害人，企圖以偉大母愛為子解困。請勿未經審察便指摘我涼薄，林伯母的經歷我當然百份百同情，幾十年後在適當時機與公眾分享的勇氣亦教人欽佩，但是兒子忽然出爾反爾，忘記謹慎判斷供詞是否有「商業文案」之弊力撐阿媽，豈不是直接示範只准州官放火不准百姓點燈？憑什麼伯母宣稱「當年我都未生林作，同其他人一齊出差，同事住隔籬房，有道門連住兩間房，細個唔識冇鎖門，對方就入咗嚟我間房」，你便信到十足十，不即席運用專業人士邏輯去找尋「幾時有泡眼淚蘊藏住，幾時要你滴都計到」的疑點？
最發人深省的還在後頭。伯母回巢後向工作機構投訴，色狼被炒魷魚，點解冇報警我們就不討論了，公司算不算單聽一面之詞武斷行事也暫且從寬不追究，但受害人竟然因為「搞到人冇咗份工」，「個心都有啲難受」，其菩薩心腸便教沒有宗教信仰的我成個彈起：阿嬸啊，你明明話畀人性侵，使唔使咁大慈大悲，後悔沒有高抬貴手放生呀？這種所謂婦人之仁根本有毒，自己甘之如飴之餘仲勸乖仔前女友不要公開，大律師，唔該摑醒佢啦。