前巴塞隊長佩奧爾最近喺俄羅斯畀人「突襲」，但身體就冇受傷，只係有少少嚇親姐。各位唔好誤會，佩奧爾冇畀人斬，但就畀兩個陌生女人性騷擾，仲差啲中招畀假陽具打中塊面！
佩奧爾啱啱先喺莫斯科出席完世盃抽籤，但日前就喺當地一間酒店大堂畀兩個女人「襲擊」。睇返條片，嗰兩個女人當時搵佩奧爾一齊玩自拍合照，而佩奧爾亦都同意。奸計得呈之後，嗰兩個女人就開始挑逗佩奧爾，話「你啲頭髮好靚，你真係好靚仔」。當時氣氛已經有啲尷尬，冇諗到其中一個人仲攞埋支疑為假陽具嘅性玩具出嚟，仲伸去想打佩奧爾塊面，又話「我好想同你做愛」。
佩奧爾當然耍手擰頭say no，而嗰兩個女人之後畀酒店保安帶走。段片冇交代嗰兩個女人係咩身份，但有網民話佢哋疑似係俄羅斯人，當時拍緊惡搞節目，但出嚟嘅效果一啲都唔好笑。