前德國國家足球隊長馬圖斯日前應邀第三度訪港，主要出席一個商務講座，噚日抽空落銅鑼灣，幫由佢做代言人嘅豹牌出席宣傳活動，其間梗係要講下明年俄羅斯世界盃形勢，佢話今屆決賽周有五、六隊有實力爭盃，當中德國依然最強。
睇好祖家德國贏世盃
56歲嘅馬圖斯上一次嚟已經係97年，佢話：「當年英國放棄香港，為國際足協明星隊出戰回歸盃，20年後嚟到見到香港有好大轉變，機場都唔同咗囉。」佢出席公開活動時仲獲安排試吓港式奶茶同菠蘿包，仲獲余煒廉、陳港斌同韋健豪等小將送咗個有馬圖斯名嘅小巴牌留念。
近年冇教波嘅馬圖斯就做咗講波佬，出年就會現場評述俄羅決賽周，佢話德國分組唔易踢，但有成40個可以應付最高水平嘅球員，至於點解咁多人接到班？佢就話因為德國足球改革後，搵最好嘅教練從社區同學校教小朋友，有最好教練教，自然教出好球員。講到世界盃決賽周有五至六隊有實力爭冠軍，佢認為當中以德國、巴西同法國最強，而德國平均得嚟仲可以平衡到攻守，可以秤高啲咁話。