今屆廠商會會長改選，火藥味甚濃，兩位角逐者吳宏斌 （圖）同徐炳光鬥得難分難解，兩陣營更加互相狙擊，最後更搞到要報警，商會罕有地唔團結，據聞此事都驚動到西環，而徐炳光則喺尾段宣佈棄選，結果廠商會會董噚日選出吳宏斌接替李秀恒做會長，明年1月1日正式上任，任期至2020年12月31日，而新一屆會董會就職典禮就喺明年2月8日舉行。
吳宏斌話對獲選會長非常榮幸，承諾未來竭盡所能，團結廠商會上下，為會員同業界而努力，又話會秉持廠商會宗旨，以促進香港工業同貿易發展為首任，並代工業界向政府發聲。原來香港職訓局都喺噚日頒授榮譽院士榮銜畀吳宏斌。即將卸任嘅李秀恒就感謝會董同會員過去三年嘅支持，相信廠商會喺吳宏斌帶領下有持續良好嘅發展。